古巨基、吳雨霏（Kary）及方力申昨日出席電台活動，對於舊唱片公司被傳拖糧、鄧麗欣（Stephy）及Kary首當其衝，基仔坦言未有所聞，並力撐在舊公司時從未被拖數：「一向有專人幫我睇數，應該冇問題，如果有問題都會同我講！（金牌大風幫你接廣州騷收錢未？）唔知，英皇會幫我搞！」另外，對於好友雷頌德傳被踢出金牌大風，基仔驚訝地說：「乜咁多傳聞！只係傳聞啫！冇回應，希望佢哋個個順利。」
至於Kary與方力申則力撐公司出糧準時，Kary說：「冇呢件事，上個月糧都出咗，可能因為老闆出咗埠，欠個簽名先會遲！」方力申則表示未聽過Stephy投訴。另外，金牌大風高層陳輝虹坦言，每逢公司有人事變動都會有傳聞，但強調公司沒有欠糧。