自接受肺積水手術後，Ken雖然復工一段日子，但身體依然未完全康復。日前記者發現他與詩雅、湯怡在銅鑼灣出席完活動後即換過便服，閒情逸致地相約行商場。雖然Ken與兩女傳過緋聞，但三人全程老友鬼鬼，湯怡與詩雅翹手行街，一副好姊妹的樣子！

放大圖片	詩雅與湯怡翹手行街，感情認真好！	洪卓立與兩位師妹睇波鞋，原來他想藉練跑增強體魄。

三人先到一間健康用品中心，Ken隨即試坐按摩椅，兩女在旁幫手調校力度，十分體貼！梳乎完後的Ken意猶未盡，試用肩膊按摩器，湯怡即親手幫他按膊頭！他亦禮尚往來幫她按摩，湯怡其後又幫詩雅按摩，三人不分「大小」，有福同享，但未有購買便走人。

歎完一輪後，三人轉場睇波鞋及運動衫。當詩雅試鞋時，Ken與湯怡就去睇衫。湯怡幫他揀的均是淺色系列，但Ken似乎鍾情型爆的黑色，兩人品味未見一致。其後，湯怡與詩雅在店內不停睇衫，無聊的Ken走出店外煲電話粥，剛巧遇見Fans邀合照，他亦大方應允。

三人行食兩支甜筒

歎完按摩與睇波鞋後，三人最後到電糕店食雪糕。不過，三人只買了兩支甜筒，可能是兩女怕肥之故！期間，詩雅不停餵湯怡食雪糕，還幫她抹嘴，反將「舊愛」Ken冷落一旁。事後，記者致電Ken笑他享齊人之福，他即急忙澄清：「佢哋好好人又靚女，見我啱啱好番咪諗住陪我跑步做運動，所以先嚟睇波鞋，順便試吓按摩椅，希望我快啲好番！（傳過緋聞唔尷尬？）兩個都係好朋友，緋聞冇影響我哋嘅感情！」湯怡與詩雅則取笑Ken：「知佢冇朋友咪陪佢行街囉！佢喺公司得我哋兩個最好傾。」