李曼筠（Maggie）雖然年紀輕輕，但甚為懂得慳錢之道，深明小數怕長計的她，閒時最愛搭巴士代步：「好似我住大埔咁，好多人都以為要去將軍澳做嘢，一定係搭火車轉港鐵最快同最方便，但其實咁諗就大錯特錯喇！由大埔去將軍澳，如果搭火車去九龍塘再轉港鐵，起碼要用成個鐘，仲要畀成$12.8，好貴！但如果搭巴士就唔同，先用$8.8搭74X去觀塘，之後用轉乘優惠7毫子搭296A就去到將軍澳，雖然連埋等車前後都差唔多成個鐘，但就比搭火車轉港鐵平咗$3.3，而且分分鐘成程車都有位坐，你話係咪好好多呢？」
平日常到尖沙咀出席活動的她，最愛搭271代步：「呢架車真係又平又快，而且仲可以直達我屋企，反而搭火車去到大埔就要再轉車先返到屋企。而且271總站喺尖沙咀，所以我上車可以揀到我最鍾意嘅『王位』坐，就係前排最右邊嗰個位，我貪個位可以望到風景之餘，私隱度又夠大。」