小小So早前行銅鑼灣名店，咁啱撞到日本人氣名模渡邊知夏子（Watanabe Chikako），佢經常幫日本嘅時裝雜誌《ViVi》拍封面，小小So咁緊貼潮流，點會唔認得佢呢！雖然唔係人人好似我咁勁認得佢，但係佢都吸引唔少途人目光，皆因除咗佢的確係一名靚女之外，最主要嘅原因係佢行商場時，竟然用條酒店嘅白色大浴巾包住自己，有時又會摟埋上身，打扮咁出位，真係冇人望都難。
唔知係咪因為佢當時着住超迷你短裙仔，怕搭扶手電梯時會走光，所以遮住下半身呢？條毛巾唔止可以防走光，香港商場出名冷氣勁，凍嘅時候又可以保暖，都真係好有用喎！呢啲唔知係咪日本嗰邊新興嘅防走光招數呢？小小So都覺得咁鍾意跟日本風嘅(口靚)模，遲啲可能都要帶毛巾出街喇！