12/07/2009

播放本新聞相關短片

周國賢義不容辭

已有三年多沒有推出個人專輯的周國賢(Endy),其新曲加精選《College》最近面世,亦是他首張精選專輯,算是個人音樂里程碑。剛踏入三字頭的Endy,定下未來的音樂發展方針:「嚟緊會以組合Zarahn發展,個人發展就隨緣,總之音樂上以Zarahn為主。」毅然拋下男歌手身份,會否感到不捨?他豁達地說:「唔會呀!兩樣都做過,入行我最想做Band,同佢哋(Zarahn)一齊玩,震撼力強好多倍。」

曾有拗撬想放棄

雖然Endy已是兩女之父,兼且有時要接手處理家族生意,十分忙碌,但他對夾Band仍充滿熱誠,不會輕言退出,一定會玩到老。對於Zarahn,Endy有解不開的情意結:「早半年隊Band差啲散,大家研究過,究竟係做自己音樂,抑或一齊夾Band,中間有啲誤會,有啲忟憎位,又各有各忙,有一次同成員Joey傾開偈,話不如散咗隊Band啦!其實當時好多嘢都Plan好晒,但唔知點解會咁大鑊,結果我哋半年冇夾Band。」

Endy思前想後,醒覺大家只是鬥氣,他不想放棄與好兄弟一齊奮鬥的日子,於是主動言歸於好,他說:「我寫咗篇4,000字嘅嘢,講我對Zarahn嘅感受,Send晒畀班兄弟睇,之後見面,大家攬住一齊喊,雖然我哋唔知前路係點,只知有場硬仗要打,夾Band係要夾人,我好珍惜呢班兄弟!」

家有嬌妻有壓力

Endy的新曲加精選專輯,每首歌均由他作曲,雖然不少唱作人也有「技窮」時,但Endy表示甚少發生在他身上:「唔會冇靈感喎!好多嘢都喺生活上攞靈感,有時睇戲或如廁都會攞到Idea。」

家有嬌妻的Endy表示,一定要行為檢點,不能有桃色緋聞發生在他身上,他笑說:「有時壓力都幾大,真係盡量唔好有(緋聞),否則肯定萬劫不復。(飛來蜢?)咁又真係冇喎!我本身生活有規律,經常鎖緊自己,將精神放喺音樂創作上。」

後記:潮爸爸好玩得

Endy雖已年屆30,但天生一副孩子臉,怎看也不似是兩女之父,而且性格大細路。拍攝期間,叫Endy擺任何甫士也絕冇托手胆,與張繼聰及陳奕迅等「潮爸」同樣玩得兼Talk得!