向來鍾愛大自然的Abbie、無論滑雪、滑水、打高爾夫球及滾軸溜冰都好，最愛夏天滑水解暑：「滑水係一級級上，由起水、側身、跳起到180°轉，每次學試一個動作都會好開心！基本動作都OK，唯獨『360°跳起轉』仲未掌握到，只試過成功一次，因為要好大勇氣！滑嗰時要有少少浪，等個浪頭嚟時跳起，時間要配合得好好，無論手力、腳力同腰力都要用，有時體力真係未必負荷到！試幾次就攰到死，不過我唔多服氣，要向高難度挑戰，一定要做到為止！（受傷？）咁又冇，不過玩完周身痛囉！」

貪滾軸溜冰夠激

滑水之外，Abbie亦喜歡玩滾軸溜冰，貪其夠刺激又有速度感：「當年學識冇耐，我就學人由斜坡衝落嚟，自己都知未夠水準做呢個動作，結果喺斜坡滾住落嚟，足足有50碼！」

滑水基本步

1. 浮水：身體在水面，雙手執着滑水繩，雙膝屈曲，盡量貼近胸前，浮在水面等開船。

2. 起水：開船後雙手保持伸直，身體重心向前傾斜約45度，雙腳保持屈膝。

3. 右轉向：未站起前，將手向左靠近腰部，雙手及雙腳微曲，重心放在後腳。成功起水後保持平衡，若失重心便放開繩索，以免受傷。