12/07/2009

播放本新聞相關短片

Edison為復出不惜被寸「唔得」

陳冠希為重返香港娛樂圈,前晚現身撐旗下藝人陸永的首個Talk Show,對方在台上明寸暗撐他!雖然臭史被翻兼被暗寸無能,惟他仍笑容滿面!

陸永前晚於新光戲院舉行首個《陸永棟篤撐我係明『升呢』》Talk Show,身為老闆的陳冠希(Edison)專程返港,更率領何超儀、李璨琛、C君及DJ Tommy捧場,並坐正第一排,十分高調!觀眾見Edison出現即叫囂及拍掌,而他見陸永出場時亦興奮大叫兼拍掌,十分投入!

測試觀眾接受程度

一直有指Edison密密返港是為復出鋪路,而前晚陸永的Talk Show更公然辣埋「床照風暴」做話題,似是試探觀眾對Edison的接受程度。陸永甫開騷即問觀眾:「近年有咩最令大家激情嘅事?」台下有人高呼:「你老闆!」惹來全場大笑!自稱人民喉舌的陸永,不怕冒險插老闆Edison,雖然他口口聲聲說「插老闆」,但實質明踩暗讚:「張繼聰唔及我個樣都娶到好老婆,我有咁嘅樣,所以冇乜才華!我以為Edison靚仔又有錢又有才華,有啲嘢應該用唔到(暗指下體),但係佢公開用到,仲係勁用!佢錯在攞部電腦畀人整,仲畀人偷埋相!」他叫嬲Edison的觀眾可以拍掌,但只傳來零落掌聲,問到是否支持他時?則全場拍掌。

陸永更狂踩「床照風暴」被告之一的電腦公司前職員史可雋:「我老闆靚仔又有才華,但唔識整電腦,史可雋咁嘅樣咪識囉!」他又提議Edison復出大可做電腦軟件代言人,品牌叫「史可雋」,或做補習天王,教大家講「Indefinitely」是「無限期」,逗得台下的Edison一時用手掩面,一時擰頭偷笑。Edison難得返港,前晚睇足全場,最後由保安護送離開。問到可介意被擺上台?他笑着擰頭,之後拉大隊到灣仔消夜,至凌晨1時半才返酒店。

楊超成避談Vincy分手

另一邊廂,楊超成前晚出席《東華賢仁匯聚顯愛心晚會》時表示,將與女兒楊永晴(Vincy)到歐洲參加兒子的畢業禮,問到Vincy近況?他說:「佢乜事都冇!(佢同Edison分咗手?)唔知,唔好問我,細路哥嘅嘢,我唔理佢哋!(Edison返港有冇同你打招呼?)我唔知!佢做乜搵我?我哋都有好耐冇見,佢復出係佢嘅事!(Edison讚過Vincy係Superwoman?)我個女梗係好!」