本文重點
近年人氣急升嘅徐子珊，其實早喺佢當選港姐冠軍嗰時，小小So睇好佢喺娛樂圈大有作為！子珊一出道都一帆風順，最初就畀黎明睇中合作拍廣告，仲傳出緋聞，令知名度大增，然後又埋到杜琪峯堆拍戲，最近仲出埋唱片做歌手。早排喺《家好月圓》飾演大奸角「嘉美」演得入木三分，令觀眾對佢恨之入骨！
其實當年子珊當選港姐後，唔係咁識處理人際關係，搞到好多人都唔係咁鍾意佢，不過隨住時間嘅磨練，令佢明白到好多人情世故，待人接物方面好咗好多，好多人都對佢另眼相看！
細心兼有禮
小小So早前去片場探朋友，就見到有記者喺度探子珊班，佢同啲記者都幾好傾，仲好識做咁同記者講唔好意思，要佢哋久等，又安排大家企埋喺樹下，以免被烈日曬親，真係細心！小小So見過唔少紅人紅星，佢哋大紅大紫都同佢哋以禮待人有關，其實唔好理係咪做娛樂圈，待人友善都係做人嘅基本條件！