早已達到適婚年齡的楊千嬅大表高興：「嘩！開心到爆呀！好心急想知個仔似邊個，不過最緊要一家人幸福開心。（你恨唔恨生BB？）哈哈！我生咗張碟先啦！依家錄緊音，出唔到碟唔使旨意生仔呀！」
身在上海的劉偉強說：「好開心呀！Kelly個仔一定會好似我個仔咁靚仔嘅。（醒啲湊仔貼士？）湊仔最緊要有耐性，三、四個鐘要餵一次奶都幾辛苦㗎！Alex要幫Kelly手，佢啱啱生完好需要休息，餵奶換片都要幫手做，咁至係好老公。」
程小東：「恭喜晒，BB一定好精靈。（打畀Kelly恭喜佢？）一陣間會，我都好想見吓BB！」
跟Alex父母稔熟的謝賢說：「恭喜晒！Alex父母一定好開心，今日我唔會打畀佢哋住，等佢哋睇完個孫，流完晒啲口水先，我再打畀佢哋恭喜啦！（會唔會教佢補身？）佢哋使乜我教！」