最近雷頌德（Mark）因要以唱片監製身份幫衞蘭（Janice）宣傳佢張英文新碟，所以頻頻曝光，好多人見佢冇咗個大肚腩，都估佢可能係為咗做宣傳而積極減肥，喺幾個月之內成功同個大肚腩講拜拜。不過啲人就好八卦，想知Mark到底點樣可以咁快減到磅，估緊佢咪喪做機同食減肥藥添！
為咗幫咁多位想減肥又減唔到嘅貪靚一族解開呢個謎團，小小So就打咗個電話畀Mark，問吓佢有咩減肥竅門。
小小So ：阿Mark，你係咪為咗上鏡靚啲而減肥呀？
Mark ：係貪靚，不過唔係為上鏡囉！我減咗肥好耐喇！好耐以前都可以攝件衫入褲度，一啲都唔怕有肚腩。
小小So ：咁你點減肥㗎，講嚟聽吓好喎？
Mark ：咪用意志力囉！好似上次同Janice做專訪，成枱都係雞翼等美食，我都好自制唔食，只係齋飲咖啡咋！Janice就忍唔住口食咗一隻雞翼，但我都不為所動，冇食過。
小小So ：咁仲有乜嘢要注意(口架)？
Mark ：好簡單，就係夜晚嗰餐戒食澱粉質，即係唔好食飯、麵、米粉咁，其他都食得，但當然唔好勁食啦！我就係咁成功減肥(口架)喇！