在荔園第六劇場演戲足有七年長，晚晚無間斷，師兄弟每晚都要扮演不同角色，演出不同劇目。而且又往往沒有劇本在手，所有對白都是靠死記硬背，記錯對白可說是司空見慣。

元秋爆粗噴大師兄

本來，台上講錯對白，同台師兄弟當然樂意補鑊，頂多只當是爆肚笑料，不過有次大師兄洪金寶（三毛）卻因忘記對白，令同台的元秋忍不住爆粗，元秋說：「有次我同三毛同台，佢有段獨白，但係佢唔記得咗，當時佢竟然對我講：『你猜！』我就回敬咗佢一句：『去你媽的！』」

大師兄三毛甩轆又豈止一次，正如元秋所說：「我哋晚晚都做唔同角色，個個角色嘅扮相同埋對白都唔同，有時會搞到亂晒龍，一出台個腦就一片空白。」

除了忘記對白之外，由於後台人多雜亂又地方淺窄，也曾引發不少蝦碌事件。其中當然少不了成龍的份兒，他說：「嗰陣時大家都會將衫褲掛喺後台道牆上面，有次我個造型背脊插住4支旗，我一行出台就聽到啲觀眾係咁笑，原來當我行出台時支旗勾到條牛仔褲，結果我就掛住條牛仔褲行出台。」

包公出場掛兩把鬚

所謂一不離二，二不離三，成龍談起蝦碌還想起了一件趣事：「有次我做包公要掛鬚，喺後台準備嘅時候我將把鬚掛咗喺腰帶度，到出場時又順手攞多把鬚掛喺面上，一行出台就講第一句對白：『老父……』隻手就順住把鬚一路掃，嗰次我隻手掃到落地下！不過因為做包公着住黑衫黑褲，大家都睇唔到我戴咗兩把鬚，以為啲鬚長到落地下。」

這班反斗星，不論師兄師弟，既有忘記台詞，亦有勾褲出場，又有台上瀨尿，真是各有各蝦碌，更甚者台上「大覺瞓」、失足碌落台……真是要幾精彩有幾精彩啊！

不過失敗乃成功之母，有錯失始知自我激勵，從中吸取教訓才會進步。洪金寶、成龍、元彪、元華、元秋等，往往將過錯累積成寶貴的經驗，多年來在影圈能各領風騷，成功並非幸至。