亂揼地呃師傅

好逸惡勞乃人之隋性，何況只得七、八歲的反斗星，每天只知筋疲力竭的練功，埋頭苦幹的做戲，偶爾「偷偷雞」絕不為過！

他們偷雞的妙法其實萬變不離其宗，主要都是趁師傅不在，或不為意時盡情地「Hea」。計仔多多的元華笑談舊事，原來每當師兄弟齊集天台練功時，無論師傅距離有多近，只要知道自己不在師傅視線範圍，便會想盡法寶偷懶。

「有時師傅會落去樓下抖吓，雖然明知師傅就喺下面豎起隻耳仔『目及』實，但我哋一樣係咁意揼吓地就算，等師傅有啲聲聽吓，覺得仲係練緊功，不過其實我估師傅都心知我哋做乜㗎喇！」

師兄弟大多生性頑劣，練精學懶自不足為奇，但想不到即使平日十分乖巧，甚少撩是鬥非的師姐妹，練功時也曾「打斧頭」，就連無所不能的元秋亦不例外。不過元秋她們卻不像元華般幸運可以逃過師傅法眼，反而每一次都是「偷雞唔到蝕把米」收場。

倒豎葱最攞膽

元秋及元甫異口同聲說：「最記得嗰時喺天台跑圓場，除咗要練步法之外，仲要練埋做手，隻手成日弶起其實好鬼攰，所以每次以為師傅唔為意嘅時候，我哋就會放隻手落嚟就咁跑吓就算，點知有次師傅見到我哋偷懶，於是就一邊攞條藤係咁打，一邊係咁鬧：『懶吖嗱！』個個嚇到係咁走，結果好似賽跑咁，雞飛狗走。」

除了天台練功令人叫苦連天外，每天甫起床便要做足一小時的倒豎葱，亦令他們苦不堪言，尤其手力不夠的師姐妹，更經常趁師傅不為意時停下休息，可惜最終又被捉個正着。曾經「中招」的元秋便一再笑說：「我哋嗰時會做做吓倒豎葱停低，然後Fing吓隻手等佢冇咁攰，點知又畀師傅發現，反而仲叫我哋練耐啲同練多啲，真係好慘。」

偷懶人人都會，但對七小福而言，「偷」只為鬆一鬆，練功時卻是認真無比的；若非經過艱苦鍛煉怎會成材，當看到繞指柔變百煉鋼，就明白不可能變可能的神奇了！