小小So喺呢個圈咁多年，都見到唔少藝人拍拖、結婚兼生仔，淨係去大大小小飲宴都不下數百次，雖則成日都話娛樂圈好多人離離合合，不過喺小小So眼中有唔少都係模範夫婦，好似陳奕迅（Eason）同佢老婆徐濠縈咁，Eason次次開騷，老婆同囡囡康堤都一定嚟捧場。
雖然阿徐成日畀人話大使，鍾意掃名牌，不過Eason次次都維護住老婆，仲搏命賺錢，畀家人可以舒舒服服住豪宅，有次小小So去紅館睇演唱會，入場冇耐就見到阿徐同黃偉文入場，中途先見Eason匆匆入場，觀眾見到Eason都忍唔住大叫，嚇到佢突然又唔見咗人，小小So仲以為佢怕搶風頭掉頭走，點知冇耐就見Eason拎住兩袋「麥記」入場，原來佢特登出去幫老婆買嘢食！嘩！堂堂樂壇天王竟然為咗老婆去買外賣，認真唔話得，見到阿徐食得咁滋味，都忍唔住要讚吓呢個好好先生。