好多藝人出席活動時，都會遇上撞衫、撞褲同撞鞋嘅尷尬情況，日前小小So獲邀請上咗內地成都參與頒獎禮，咁啱小小So坐喺金牌大風張枱隔籬，諗住影張相留念，小小So先拍拍蘇永康膊頭示意佢行埋小肥同傅穎身邊，點知佢推極都唔肯，似有啲難以啟齒，小小So就問佢點解？康仔好有禮貌咁話：「一陣先啦！因為我同小肥撞眼鏡。」又係喎！唔講小小So都冇留意。
點知唔夠十分鐘，康仔就主動搵番小小So，仲道歉話：「頭先唔好意思。」原來佢走去換咗另一副眼鏡，康仔仲好幫手咁拉埋金牌大風所有歌手影張大合照，避開撞眼鏡嘅尷尬情況！
其實好多歌手都冇乜口齒，最鍾意講完唔算數，小小So真係好希望啲歌手學吓蘇永康呢個前輩，康仔能夠屹立樂壇咁多年，真係有佢成功之處。