王浩信（Vincent）前晚於銅鑼灣CEO Neway開生日會慶祝26歲生日，陳柏宇、蕭正楠及梁烈唯等皆為座上客，但女友陳自瑤（YoYo）卻疑受到無綫壓力不見影，據知有人收到無綫的電話，被叮囑「寧被人知，莫被人見」，故臨時甩底。
Vincent雖形單影隻，仍難掩拍拖的興奮：「有拖拍特別開心，我入行以嚟遇唔到紅顏知己。（7月7日正日女友再同你慶祝？）YoYo應該準備咗禮物，我估係煮嘢畀我食。其實TVB同唱片公司都知我拍拖，公開戀情冇壓力，本身唔介意，但我唔係博宣傳。」
而YoYo昨日出席活動時甜絲絲回應戀情：「唔係畀人影到都唔想公開，我哋冇激吻，蜻蜓點水式Kiss咋！（點賀男友生日？）會盡量令佢難忘。（見家長？）Vincent好似係咁同記者講，我覺得大家印象幾好，佢父母應該睇咗報道，正常游水、搽太陽油唔怕破壞印象，但下次會小心。（蔡淇俊話你變咗！）佢話咩？（話你黑咗！）係，我想轉形象。」同場的蔡淇俊被問是否甩難，他說：「同YoYo合作多至傳緋聞，戥佢開心，但我冇拖拍唔開心。（酸溜溜？）冇！」