友情篇
不少好朋友都是由細開始認識，但Toby和Natalie卻偏偏在不同的家庭環境下成長，令經歷和性格都各走異端。
T：大家都知道我Daddy喺無綫工作（無綫製作部總監梁家樹），其他人覺得我入行靠父母，但其實我做歌手先。成日畀人奚落、畀人講埋屋企人都好心痛。不過人大咗，知道唔可以怨落去，條路係自己揀，觀眾唔會睇過程，只會睇結果，我只希望大家能慢慢接受我，唔係要一聲「嘩！你好勁」，更加唔係要做女主角，我只係鍾意演戲，好想大家睇到我有進步，畀個機會我。
N：我喺唔完整家庭長大，自小父母分開咗，佢哋要出外拚搏，而我小學已經自己返學，每日同哥哥食飯，好多事都由自己解決。細個好自閉，成日匿喺屋企，我習慣一個人，仲試過無無聊聊一個人去荔園玩。
T：我都有捱過，由細到大唔係唔使做，我有出去打過工，去深水埗印紙盒、教游水、教英文、整珍珠奶茶、做清潔，乜都做過。
結交朋友睇緣分
N：我工作經驗冇咁多，讀中學時有星探搵我做模特兒，當時屋企環境OK，媽咪冇畀壓力我，只係同我講工作地方唔係要嚟交朋友，所以識到Toby真係一個緣分。
T：朋友唔使多，圈中Keep到好好嘅只得三個，有湯盈盈、Van仔（鄧穎芝）同詩詠，唔知係咪因為詩詠好瘦，真係有衝動保護佢、加上大家蠢蠢地，所以好夾。
N：可能大家成長背景唔同，佢嘅思想較樂觀，而我好悲觀，成日會從最壞一面去諗，正因為思想一凹一凸，反而互補不足。
T：早前佢媽媽有事（逝世），我都專登由深圳飛返嚟陪佢，雖然唔係幫到好多，但朋友唔開心一定要喺身邊。
N：講真以前覺得娛樂圈好難交真心朋友，因為拍劇日對夜對三個月，當時一定好融洽，之後各自接另一部劇，感情就會冷卻，只係睇大家會唔會行多一步。我媽咪喪禮嗰兩日Toby專登請假嚟陪我，真係好感激，佢都試過唔開心，凌晨打畀我叫我接佢，天腳底都會照去！
後記：
Toby最近忙在深圳趕劇，難得返港與好友Natalie敍舊，原本打算接受完本報訪問後一齊行街Shopping，可惜Toby全日都被雜誌狗仔隊跟蹤，令她雅興大消，Natalie則在旁安慰：「算啦！你有Gimmick先有人跟，我等陣都陪你行街。」好姊妹真是患難見真情。