新進女歌手文恩澄除了懂得多種樂器外，最近更愛上攝影，機不離身的她去到邊影到邊，當中更領略到不少人生道理。
文恩澄（Rannes）性格爽朗又充滿好奇心，加上坐不定的個性，間接令她成為「周身刀」。眾所周知，Rannes精通各種樂器，最近她又培養新興趣：「我最近學緊日文同影相，影相真係好好玩，可以無時無刻記低生活點滴，雖然部相機有啲重，但係我都唔捨得放低，去到邊影到邊。」
Rannes透露最初學影相，只為她養的小狗及小貓拍下可愛一刻，後來愈拍愈多，連身旁的朋友及風景亦一一攝於鏡頭下，她說：「原來用相機睇呢個世界好唔同，每個人、每個地方都有值得影低嘅地方。」Rannes表示學攝影不止是一種興趣，從中更學會做人道理：「因為局部去睇一個人、一個地方，或者用唔同角度去影，都會有好唔同嘅感覺，有時候，仲會有意想不到嘅發現！」