陳自瑤（YoYo）與王浩信（Vincent）被拍得在泳池邊喪啜摸胸，Vincent昨日公開承認與YoYo拍拖大半年，更曾帶YoYo見家長，並被父母力讚，故他們才會在公眾場合旁若無人：「我睇到新聞都嚇一嚇！我哋當時睇過周圍冇乜人先咁做，如果影響到屋苑其他人真係唔好意思！不過我要澄清冇同YoYo同居！（避忌吓？）其實我哋游水好健康，下次一定睇清楚冇人先咁Close！」
至於YoYo前緋聞男友蔡淇俊直指她大膽，相信公司會施壓。而曾與Vincent傳緋聞的陳法拉，戥對方開心：「咀都冇咩啫！只要自己接受到，唔需要理外人點睇！」曾傳力追YoYo的司徒瑞祈（阿水）亦表示與他們相熟，但不知道他們拍拖：「我澄清冇追過YoYo！但我都會SMS佢問吓！如果真係拍拖，情到濃時咀吓都好正常！」此外，無綫高層樂易玲表示知道「陳王戀」，並認為他們的行為不算過激。