十位候選港姐與十二位候選港男，聯同港姐出身的高海寧、張嘉兒及鄧上文，到番禺長隆水上樂園拍《當香港小姐遇上香港先生時》，兩批男女分隊打水球，其中港男（10）吳雲甫多次飛身救波，玩得落力兼投入！未知是否因今屆港姐質素太差，往年吸引內地遊客狂兼狂影的情況不復見，圍觀者少得可憐。而擁有「W胸」的高海寧更在苦無對手的情況下，「凸」圍而出，反而港男（8）「大隻Jim」李偉健則憑巨胸與她匹敵，十分搞笑。

「大隻Jim」李偉健露出結實胸肌。	十位港姐佳麗齊齊戲水消暑，認真透心涼！	港姐質素欠佳，一班港男惟有谷肌救亡。

撐佳麗質素平均

在（1）曾曦寧腿粗及（10）李姿敏凸腩的情況下，高海寧憑「W胸」成功搶「峰」頭。被指「喧賓奪主」的她說：「唔係啩？今年唔係有個身材好勁嘅女仔咩？（唔覺喎，得你最勁！）多謝！泳衣係公司安排，我都有為今次拍外景Keep Fit，但唔係想搶風頭！（佳麗質素差？）今年好平均，我有同佢哋傾偈，佢哋好Nice！最深印象係（4）嘅笑容！（你今年先選會唔會吃香啲？）冇得咁講！我參選嗰時都係熱門，仲有得去加勒比海拍外景添！（有冇向（1）教路，佢同你當年一樣多是非！）我冇留意！但佢有主動同我Say Hello！」她又表示不覺得（1）曾曦寧有公主病。

張嘉兒穿上比堅尼搶師妹「峰」頭。	（9）袁嘉敏不時細心檢查泳衣免走光。	一眾港男及港姐齊齊打水戰，旁觀者則落力為他們打氣。

至於「大隻Jim」李偉健說：「我03年開始，每個禮拜做三、四日Gym，我覺得自己身材平均！（有冇加操？）冇！忙綵排。（大隻增添信心？）唔會！其他參賽者都好平均！（少年組好奀喎！）佢哋勝在有活力！（有冇被佳麗美色吸引？）冇！今次嚟做嘢！（質素差，吸引唔到你？）唔會啩！」