01/07/2009

播放本新聞相關短片

爆炸堂:雷頌德絕頂貪靚執到正

娛樂圈雖然唔少靚仔靚女,但小小So眼中認為真係識得打扮、着得潮又着出自己風格嘅,真係冇幾多個,而金牌監製阿Mark(雷頌德)貪靚指數絕對爆燈。早排小小So跟個歌手朋友上咗阿Mark開設嘅錄音室,咁啱就遇到阿Mark喺度,大家知道喺錄音室開工正所謂「不見天日」,人都唔見多個,但阿Mark依然係「執到正」,粉藍色恤衫同黑色漆皮鞋,收身吊腳褲,最啜核係戴埋頂藤帽,差啲以為阿Mark去行Fashion Show。

小小So:嘩!你淨係返嚟開工都扮到咁靚?

Mark(笑笑口):係(口架)!邊可以求其。

小小So:你係咪驚行出街遇到狗仔隊偷拍,都有個靚Look示人?

Mark(點頭):當然,我唔知幾時會被人影嘛!做足準備好啲。

其實小小So知道阿Mark都係講笑啫!佢唔係怕人偷拍,而係根本就係鍾意着靚衫,我小小So仲知阿Mark唔只出街執到正,就連喺屋企都一絲不苟,「烏歪」兩字一定唔會出現喺佢身上,怕且相信連黎明都服咗佢。