于師傅的嚴刑厲訓是人所共知的，但正是「你有張良計，我有過牆梯」，只能以美食調劑生活的師兄弟，自然不會放過「偷嘗」零食的機會，家中經營士多的元彬還記得，他亦試過偷運雪條給師兄弟分享，但最終卻換來「嚇破膽」收場。

嚇到成條棍吞落肚

元彬說：「我哋成日以為偷食師傅就唔知，點知佢乜都知。我記得嗰次我偷運咗兩支雪條，仲要分咗一條畀元武，點知都未食，師傅就走咗上嚟，我嚇到半死，咪即刻將支雪條收埋入頂帽度囉！結果搞到成身都係。元武仲好笑，佢一聽到師傅嘅腳步聲，就嚇到成支雪條連棍吞咗落肚，真係服咗佢！」

偷嘗雪條「禁果」，自是偷偷摸摸，但令人始料不及，原來連對現代人普通得不能再普通的叉燒，他們也不能光明正大地吃，皆因這等美食並不是人人吃得起，吃得太高調的話，只會惹來師兄弟爭個你死我活。

元秋回想起花3毫子買叉燒又偷吃叉燒的日子，便忍不住開懷大笑的說：「嗰時我成日偷運叉燒上樓加餸。當年冇乜好嘢食，日子就係咁過(口架)喇！」

夜總會老闆請消夜

無論是五、六十年代，還是現今社會，「搵食」都要講實力，昔日的七小福除了自度妙計偷鮮外，晚上於歌舞廳表演完絕技後，亦有不少慈祥的老闆送上「消夜」慰勞。美食當前，再與三五知己把「餸」言歡，對於由早上六時捱至半夜的肚餓大軍來說，絕對是人生一大樂事。

表演完後最愛與師兄妹邊消夜、邊談心的元甫，便笑稱十分珍惜半夜的「合家歡」時段，即使是簡單的炒麵，已是難得一見的好餸：「食消夜好緊要，樂宮樓同麗池嘅老闆好好人，差唔多次次都會請我哋消夜，有蛋花湯啦、炒麵啦！啲餸梗係好過學校食嗰啲啦！」

兄弟同心，其利斷金。做得好師兄弟，有食就一齊食，有架自然就一齊打；當街童遇上街童的時候，大戰一觸即發……