容祖兒、泳兒和陳偉霆（William）昨日接受電台訪問，雖然有指泳兒得寵令祖兒失寵，但兩人沒有尷尬，有傾有講未見異樣。祖兒坦言對傳言沒有感覺，亦叫泳兒毋須不開心。對於米高積遜猝死，祖兒感觸地說：「佢離開可能係解脫，近年好多負面報道而忘記佢為樂壇付出好多。（MJ整容？）呢個只係外殼，影響唔到佢真正實力，外表點變佢都係最有靈魂嘅舞台巨星，佢唔整都靚仔，黑黑哋幾Cute，整咗就獨特啲。（曾被指貌似MJ？）MJ係神嚟，神聖不可侵犯，我點可以同神比。」
對於緋聞女友Angelababy被周刊指有矯唇疤痕，William笑說：「我絕對可以幫佢澄清，嗰粒係痱滋嚟，我睇完爆笑咗好耐，佢鍾意食零食，熱氣成日都生痱滋！」談及MJ整容令身體五勞七傷，泳兒說：「如果可以令自己有自信又安全嘅情況係可以接受，唔好整到面目全非、過晒火位！」此外，今年《太陽計劃》主題曲以粵、普、英、日四種語言合唱，包括祖兒、泳兒、William、鄧紫棋、徐子珊、林俊傑及日本天后及倉木麻衣齊聲獻唱。
