杜德偉女友王珈晴（Bibe）近期好積極接嘢做，小小So見有時間走咗去探佢班，佢咁啱着住背心裙喺度影嘢，唔使埋位影相時，件外套都唔離身，要埋位就除咗件外套，望多幾望，先發現佢背部有個紋身，小小So即時問佢個紋身係乜？Bibe表現得好無奈，話係「天蠍座」。
小小So以為佢係天蠍座，所以特登紋個星座落去，不過Bibe就話：「唔係，係我第一個男朋友嘅星座，我都唔知幾後悔，當時我只係得十幾歲，樣樣都以男友為中心，簡直可以話畀愛情蒙蔽，佢話如果我唔紋就代表我唔愛佢，咁我即時去咗紋，點知第日佢就同我分手，我簡直後悔到死，但已經冇得返轉頭。」
Bibe幾年前紋身，當時都唔係咁普及，仲畀人以為係壞女孩，佢話：「我唔係壞女仔去紋身，紋咗身已經好後悔，好彩依家都多人紋身，都成為咗個潮流。」但紋住前男友嘅星座喺自己身上，現任男友杜德偉會唔會唔開心？Bibe就話杜德偉都好開通，仲話：「佢依家紋身仲多過我好多。」