三師姐元秋回想當年情景不勝唏噓地說：「當年我哋有啲人特別大食，一到食飯就用個碗『吸』落個碟度霸晒啲餸，其中三個特別霸道嘅，我哋就叫佢哋做菜龍、菜虎同菜豹！因為嗰陣啱啱出咗本《龍虎豹》。」

元菊蛋河分湯同味

原來，有人為吃得更多，不惜使出必殺技，元彪說：「嗰陣時大師兄洪金寶為咗唔想畀人搶晒啲嘢食，有時會吐口水落啲餸度，搞到冇人食佢啲餸。」活在資源不足的社會，為兩餐溫飽可能要搵命博，他們一班師兄弟雖有學校包衣食住行，但為求有足夠食物，都要奇招盡出。

搶食還搶食，有些師兄弟還是比較幸運的。由於家庭不錯，飲食的待遇亦較優厚。不過他們秉承師傅教誨，有「私房菜」就要大家分，當中又引發了很多有趣故事。

公認是較富有的元菊，時不時會將魚蛋粉的湯分給師弟，她說：「有啲男仔父母唔嚟探佢，冇錢又冇人買嘢畀佢哋食，有時我有嘢食都會分畀佢哋。我父母會畀錢我，我成日都會買魚蛋粉食，元德見到就會叫我留番啲湯畀佢飲，雖然嗰啲湯好好味，我都好想飲，不過元德叫到我都會留番畀佢嘅！」元菊又記起當時若有師兄弟飲可樂，其他人便會要求留番兩啖。在學校，就連蘋果心、西瓜皮都有如黃金般矜貴，隨時會惹來一番龍爭虎鬥。

有飲有食何妨結拜

活在如斯艱難的社會裏，他們早已學會「攀附貴人」，而且來得比大人更「現實」。家境較寬裕的元彪深得父母愛錫，除了送飯外，60年代制水時期還會送熱水給他洗澡，物資從不缺乏，絕對是少爺仔一名。此少爺仔的身份卻令元彪提早體驗到社會的「現實」，如今還歷歷在目：「嗰陣時如果師兄弟有嘢食，其他人就會即刻私下同佢結拜，咁就可以分享佢啲嘢食。不過當冇嘢食嘅時候，呢啲結拜之情好容易會因少少事就斬斷。細路就係咁，感情好直接，好率真。」

七小福成長於貧困的年代，也因為這樣，在各人的成長過程中，很多生活體驗是富裕新生代無法領略的，重提童年舊事，元彪他們倍感溫馨。

為爭一口美食，往往鬧個翻天覆地；明爭明搶無疑刺激無比，但暗偷暗奪亦樂趣無窮。「偷」食當前，又是這班反斗星發揮小聰明大智慧的時候了！