黃秋生曾經有一段時間與無綫關係決裂，但最近重修舊好，還接拍邵氏投資的新片《Laughing Gor之變節》，雖然電影已拍了一半，但日前卻傳出秋生因不滿無綫藝員部經理人度期混亂而大動肝火！據知，秋生原定接獲通告於前日開工，但因同片的拍檔要同時兼顧電影及拍劇，最終被電視劇組成功搶人，電影則無奈要全日停拍。

記者致電秋生求證，他坦承有其事，還愈講愈勞氣：「係有個演員撞咗期，名就無謂講，都唔係佢嘅錯！我都唔明無線，應該有人協調藝員啲通告，呢種問題係可以避免，套戲咁趕，取消通告又牽涉咁多人同錢，係咪有人冇做好本分呢？」秋生還為一班藝員出口氣：「我唔係話拍劇唔重要，但我耳聞目睹過唔少藝員深夜先收到聽晚嘅通告，人哋唔使生活(口架)？我亦聽過有演員查問工作嗰陣，竟然畀人質咗一句：『你知嚟做乜？』好似當啲演員唔係嘢咁，我見過樂易玲嚟探班，但從冇見過有經理人跟場，由得啲演員自生自滅。」

收足片酬唔想鬥Hea

有傳秋生今趟收足200萬元片酬，但被人激一激，他怒不可遏地說：「我為套戲自己畀錢買私伙衫，如果無綫唔重視，我又一齊Hea（敷衍）囉！但我最唔想做到咁。」

在片中與秋生有不少對手戲的呂慧儀，最近又要兼拍處境劇《女王辦公室》，頓成最大嫌疑人物。呂慧儀自言不清楚，只是按經理人安排工作，她說：「叫乜做乜，冇托手（月爭）。（怕唔怕再見秋生尷尬？）唔會，秋生好錫我。（佢幫你出頭？）唔知呀！」至於《女》劇監製黃偉聲則承認呂慧儀的檔期要與電影互相協調，他說：「劇組通告排好晒，電影突然話要呂慧儀，我都建議過夜晚九點半放人，但佢哋話唔使喇！」

樂易玲下令唔畀跟場

而管理藝員科的無綫高層樂易玲表示已了解事件，並說：「小事一樁，電影星期五先落Booking，可能地點定得遲，但咁啱嗰日係個演員開廠嘅主景，惟有叫電影遷就。」她解釋今次只是溝通問題，希望將來能減少類似情況：「TVB全力支持套戲，多謝秋生畀意見，知佢會好落力去做。（秋生話經理人唔跟場？）係我落Order叫唔好嚟，落到去又幫唔到手，我想演員學識獨立。」