有傳兩位　模Angelababy和Kama不咬弦，昨日陳偉霆竟與Baby死敵Kama出席《一田．TEE生活》開幕禮任嘉賓，見兩人同台面左左，雖然大會安排Kama穿上William為她設計的Tee，更要William親自為Kama的Tee再剪花款，但二人全程眼神「零交流」，十分避忌，Kama的露肩Tee更兩度「跌膊」，幸好未有走光。而目擊的William則說：「睇到佢跌晒膊，好驚！」

William和Kama獲大批Fans捧場，場面墟冚。

William為Kama的Tee再剪花款時，顯得十分避忌。

不過，William否認因與Kama同場而避忌，對全程眼神零交流？William笑說：「咁大會冇安排合作啫！（因為Baby關係？）唔係，絕對冇。」問到事前可有向Baby提到會與Kama出席活動？William說：「冇傾開，冇講喎！（知唔知Baby同Kama唔啱？）我有睇過啲報道，應該唔係真嘅！（你又知？）Baby有同我講為咗啲傳聞唔開心，所以我咪知囉！」

否認另結新歡

而Kama同樣表示不覺得避忌：「可能我今日有少少唔舒服啦！（因有報道指你同周刊記者拍拖而唔舒服？）唉！我有睇到，係失實報道，公司諗住保留法律追究權利。」她更堅稱冇拍拖：「冇證據就亂寫出嚟！（影到相先認？）總之唔係事實，我亦唔知佢指係邊個，我同好多男女記者都係好好朋友。」