戚黛黛平日不太喜歡戶外活動，怕曬又怕熱的她甚少游水、出海玩，家中現時僅存的泳衣只得選港姐時面試的兩套，相當誇張！現時27歲的她坦言從未拍拖，亦不心急拍拖，但心急生BB！
文：影視組 攝：吳文聰
戚黛黛性格內向怕醜，嗜好亦不多，平日只喜歡留在家中。03年選港姐的她，穿比堅尼泳衣面試時，嚇到差點不敢去，她說：「我唔鍾意戶外活動，以前讀書嘅課外活動都係參加美術學會同彈結他，我諗選港姐嗰陣係我成世人運動量最大嘅時候，不過嗰陣一大班女仔一齊又啱傾，都唔係好覺辛苦。」問到有否男同學曾約她出海、游水，黛黛笑說：「啲人都係約我睇戲多，同男仔游水，我諗我會怕醜，我平時着衫都好保守，着背心出街都怕人望，我會耷低頭！（做藝人都怕醜？）唔熟我唔多講嘢囉！啲人以為我好寸，以前跟朋友去Clubbing，我都係幫人睇手袋、唔會跳舞、又唔飲酒。」
愛Man爆鬚根男
問到怎樣結識男朋友時，她說：「所以咪識唔到囉！其實我又唔心急拍拖，但我想生小朋友，唔想做高齡產婦，我媽咪都放棄咗我，話唔結婚都無所謂，之前睇相話26歲有人旋風式追我同我結婚，但係都冇，注定我做老姑婆。」
談及揀偶條件，黛黛坦言喜歡高大及有鬚根的男人：「細過我一定唔得，我又好怕啲好瘦又白淨嘅男仔，冇乜安全感，最好有啲鬚根，咁就Man好多。」
Profile
姓 名 ：戚黛黛（Priscilla）
三 圍 ：32.5、24、33.5
體 重 ：105磅
生日日期 ：10月18日
嗜 好 ：唱歌、烹飪、看電影
學 歷 ：碩士課程