高峰期為數接近五、六十人的七小福，縱然每天練完功定必一身臭汗，但這些臭汗味在各人心目中，卻是親密關係的微妙象徵。

體味倍感親切

首個發起為七小福50周年搞大型活動的元彬，提起那股賴以辨別各師兄弟的「臭味」，便笑不攏嘴地說：「我哋嗰陣日對夜對，我敢保證見自己親生兄弟姊妹嘅時間，加埋都唔夠我哋一齊練功對得多。嗰陣只要一聞到陣味，就噏得出元泰、元武、元文定係元龍返咗嚟，唔使望都知㗎喇！」

除了熟悉得連體味也能輕易分辨外，即使當時未有先進的通訊設備，但大家也能輕易掌握各人的容身之處。曾三度偷走的元彬笑言，二師兄元泰便是他的死敵，無論他逃到天涯海角，元泰也有本事站在他面前，勒令他返回師傅家中，似勾起一絲苦痛回憶的元彬說：「記得嗰次偷走之後，我去咗啤塑膠搵食，啤咗廿幾日，有一日元泰突然企喺我面前，叫我跟佢返師傅度，初初我唔肯，但元泰保證話師傅唔會打我，我就戇居居跟咗佢返去，好似中咗魔咒咁，連人工都冇攞就返去，你話邊有啲咁嘅事㗎！點知返到去未入晒個門口就已經畀師傅打到飛起，之後我都唔敢再偷走咯！」

偷走束手就擒

聽罷元彬訴說往事，元泰不禁失笑，原來他能輕易掌握元彬藏身之處，並非因他擁有甚麼通靈神功，而是因他與元彬的家人稔熟，兩師兄弟才如此「心靈相通」：「其實我每次都係問你阿媽你去咗邊咋！我好鍾意去你阿媽度，次次都有鵝蛋食，啲鵝蛋又大隻又好味，哈哈！」

縱使並非真的「心靈相通」，師兄弟間有着的緣分，卻比親兄弟更強。雖然離開學院後各散東西，但自小已分外投緣的元彬與元泰，竟然在毫無預兆的情況下在美國相逢，可真始料不及。雖相隔多年但此番相遇，還是有着說不完的話題。

元彬笑說：「當時喺美國見番元泰，知佢喺美國開餐館，我咪問佢有冇興趣喺溫哥華開分店囉！當時中國餐館都未喺溫哥華普及，依家佢喺美國同溫哥華都開咗好多間餐館咯！」

不過，即使親如兄弟亦總有拗撬時，尤其是童年頑皮歲月裏，吵架打交更是無日無之。講到打，原來一班師姐妹有膽有識，對着孔武有力的師兄弟一樣冇有怕，哪管頭破血流，照樣打他一個落花流水。