阿倫昨日為新碟舉行發布會，劉美君、孫耀威、麥家瑜、組合Mr.及多位電台高層到賀，賓客紛紛大讚「倫仔」曉風靚仔，阿倫即笑到四萬咁口，並說：「佢靚仔過我係應該架喎！我落重料吖嘛！佢好似知道畀人偷拍，有少少唔開心。（留5億畀佢？）5億？打『思噎』就有！」

阿倫（右二）即場與Mr.夾Band，活力十足。	麥家瑜Hard Sell阿倫的新碟，十分識做。	孫耀威以斯文打扮到賀。

阿倫表示曉風身高近6呎，熱愛音樂，但未有打算入行做歌手：「佢讀書幾好，拎好多獎，讀到書做乜都得啦！希望大家唔好騷擾佢，唔好逼我提早送佢去外國讀書。（好多女仔嗒糖？）冇女仔騷擾佢，我管得好嚴，畀我過目先啦！」

嘲志偉「扶貧」

另外，對於好友曾志偉被拍得有新歡，阿倫說：「咁叻？我冇見過喎！志偉份人最鍾意扶貧，專收養啲無依無靠、冇衫着、冇地方住嘅不明來歷女子。」他笑言志偉有三房，他卻有一群阿四及宮女為他打點，贏晒對方。