前日傍晚時分，小齊一家四口現身圓方，着湖水藍上衣、頭戴紅帽嘅小齊，好易畀途人認出，不過佢一於少理，繼續推住坐喺BB車嘅細仔Window Shopping。行完一輪，任家四口就去咗間日本料理開飯，期間細仔扭計，小齊大扒幾啖之後，就跪喺BB車前面氹仔，直到佢瞓着先返埋位繼續食，認真廿四孝！至於大女就全程好乖巧咁坐喺媽咪Tina身邊，小齊見個女咁乖，都密密夾餸畀兩母女，場面溫馨。

小齊見細仔扭計，飯也不食便跪地氹他。	小齊忙裏偷閒，與家人開飯享天倫。	任賢齊大女打扮有型，十足小明星。

女兒大方任影

任家四口大快朵頤一粒鐘後，大女率先行出餐廳，雖然離遠見到記者鏡頭，不過一身型女打扮嘅佢都冇抗拒，仲眼仔睩睩咁望實記者！反而小齊同Tina顧住推BB車，冇留意周圍環境，直至記者叫佢幾聲先識應，小齊話：「唔好意思，因為我冇咩地方可以去，先至嚟商場囉！」之後就攞車走人。