最近口靚模橫行，個個未到夏天已經拋胸作勢，仲講到明暑假會推出噴血寫真，日日打開報紙都睇到唔少「肉女」，最開心梗係一班男讀者啦！早幾日，小小So撞到以前同樣Sell性感嘅李蘢怡（Tiffany），見佢一排冇見人，小小So就提議佢不如影番本寫真谷吓人氣，點知Tiffany竟然話：「我唔想行番以前條路，唔想再拋胸，我想畀人全新感覺，其實我唔係介意性感，話晒我係Model出身，但唔想用呢個做賣點囉！」小小So就覺得好可惜，話晒佢又高又索吖嘛！Tiffany又話最想係做舞台劇，咁佢苦練多時嘅舞技同歌藝就可以一展所長喇！而曾經因為拍拖搞到冇心機做嘢嘅Tiffany，就話依家冇男友，不過就有人追，仲話以後拍拖都會低調啲喎！