趙式芝一直喺啟德嗰個飛行會學駕駛直升機，年初仲考到揸直升機牌，小小So同佢咁多年老友，真係戥佢開心，早幾日打電話畀佢，諗住問佢幾時帶小小So喺香港天空遊番轉，點知唔講還好，一講佢就既傷心又嬲，因為短期內都冇得飛！
小小So：你幾時載我飛番轉？
趙式芝：唔好提，依家冇得飛，因為自從一個月前啟德個場有架機撞咗落巴士度之後，個場就畀人封咗，唔畀人再飛，搞到我鬼咁失落。
小小So：咁你點算好？
趙式芝：我一路都有同民航處傾，睇吓有冇得快啲開番，冇理由唔畀人飛。
小小So：咁你最近咪冇練習？
趙式芝：少咗好多，以前一星期飛三次，Keep住想練熟啲，依家如果想揸，就要去石崗，嗰度好遠，而且只係星期六、日先開放，好多人Book，成日都冇位，所以只係去過兩次。依家最驚就係生疏咗，唔記得點揸就慘！
小小So聽到佢把聲咁冇心機，即時安慰佢，叫佢學吓第二啲嘢，暫時唔好諗住揸飛機先啦！