熱愛攝影的周柏豪，日前化身「龍友」為阮小儀主持的電台節目充當攝影師，替兩位被抽中的幸運Fans影靚相，但兩位Fans初次見面便要扮情侶，非常尷尬。柏豪落足嘴頭仍未能氹掂他倆手拖手，於是他親身上陣，更拉小儀落水齊齊示範甫士。豈料柏豪被小儀整蠱，取笑他似馬騮，嚷着要替他捉蝨，相當搞笑！兩位Fans亦因此熱身，愈影愈投入。

柏豪擒高擒低為Fans影沙龍，十分落力。	放大圖片	柏豪自爆經常找Fiona任模特兒，並珍藏她的玉照。 資料圖片

出攝影集爆情史

柏豪更自爆喜歡為同事留倩影：「入行前我已經好鍾意周圍影相，通常影風景，依家鍾意影公司同事。」曾與他傳緋聞的Fiona亦是柏豪的同事，他不諱言常常找對方做模特兒：「Fiona係一個幾好影嘅女仔，又靚女，我都收埋好多佢嘅相！」

柏豪下月出碟，又在書展出攝影集，對於口靚模湧現推出水着寫真集，問到會否擔心競爭激烈？他說：「唔會，市場唔同，我會將攝影加入童年回憶結集成書，仲講到我嘅初戀，生命中第一個鍾意嘅女仔。其實已經係幼稚園嘅事，耐到唔記得咗佢個名，希望佢睇到呢本書會搵番我啦！」