本文重點
熱舞王陳偉霆（William）下月將夥拍同是舞得之人狄易達，舉行音樂會大鬥舞技。視舞台王者郭富城為偶像的William最近不停操肌，屆時更會獻唱城城金曲向他致敬。另外，他亦考慮邀請緋聞女友Angelababy睇騷，見證其重要時刻。
陳偉霆及狄易達將於下月29日在九龍灣國際展貿中心舉行《拉闊音樂擂台》首場，兩位跳得之人會大鬥舞技。William坦言心情非常緊張，一直是城城的超級Fans的他，屆時會獻唱城城其中一首金曲，並重新編曲及排舞，向這位舞台王者致敬！
最近William進行地獄式特訓，並自製Keep Fit秘方，每日練跑健身兼狂吞12隻蛋白，務求增肌，他說：「我仲要戒澱粉質，Fit得嚟唔會得棚骨，不過好辛苦，開始咗一星期已經好悶，但我會靠意志去克服。」雖然已經甚Fit，但他仍希望力臻完美：「想完美啲，始終第一次開騷，唔想大家失望，我視為一個挑戰，未試過去到咁盡。（依家幾多磅？）150磅，我目標唔係磅數，想要六舊腹肌同零脂肪。」
識城城化妝師
由於William認識城城的化妝師，故從對方口中得知城城有留意他，William說：「城城有咩建議會透過化妝師話我知。（同城城見面？）冇呀！如果見到佢，我實興奮到瞓唔着。」他透露10月將搞個人騷，問到今次是否預演？他說：「唔係！我好認真去做。」早前被傳與Angelababy情變，問到會否請對方睇騷？他說：「我都好想請佢嚟，但最近有太多新聞，唔想畀人炒作，所以我未請佢。」除了William和狄易達外，另外幾場分別是下月30日的「張繼聰Vs麥浚龍」、31日的「Mr.Vs RubberBand」及8月1日的「農夫Vs I Love You Boyz」。