早排全智賢嚟香港宣傳佢首部荷里活電影《血戰新世紀》，小小So未見過佢真人，咪去記者會見吓呢個「野蠻女友」囉！真係聞名不如一見，全智賢Keep得相當唔錯，皮光肉滑甚有氣質。佢當日用咗三個唔同造型見傳媒，全程笑容滿面，勁有禮貌。可能跟足人哋國家嘅規矩啦！經理人表明接受記者訪問期間唔畀影相，香港傳媒亦好合作，但就畀小小So見到一幕小趣事。
話說訪問期間，全智賢鼻頭有汗，香港工作人員相當醒目，即刻隨手拎咗現場嘅「紙巾」放喺佢面前，全智賢相當淡定咁拎起企圖用之際，右手一掂發覺唔對路，原來竟然係質地粗糙嘅「餐巾」，佢即刻望都唔望就放番低，若無其事咁繼續回答記者提問。
呢個時候，佢經理人相當醒目，喺手袋度拎出一包私伙紙巾放上枱，全智賢就好有儀態咁拎咗一張嚟抹汗。成件事其實只係一件好小嘅趣聞，但小小So就體會到全智賢嘅冷靜同品格，佢唔單止冇因為嫌棄張餐巾而不滿，亦冇示意任何人為佢効勞。