早前城城獲台北市政府欽點為「2009年台北聽障奧運會」嘅國際代言人，喺八月初又會以呢個身份喺台北小巨蛋舉行《郭富城舞林正傳2》安歌場演唱會。雖然依家城城忙於拍攝陳木勝嘅新片，但佢都特別抽咗半晚嚟錄製聽奧主題曲《聽傲江湖》。

城城今年拍攝多套出色電影，包括再演「步驚雲」。

城城將於八月在台灣開個唱，為聽奧造勢。

康城買家激讚

其實城城獲選當然有因，佢無論音樂定電影都有好成績，好似今年佢拍咗多套有水準嘅電影，當中嘅《白銀帝國》仲獲激讚，話佢有機會問鼎上海金爵影帝！另一齣嘅《風雲II》前排喺康城電影節播咗三十分鐘片花，亦大受外國買家歡迎。《風》片嘅電影商有見及此，特別剪咗一段最新預告片放上網，片中除咗有城城晒肌肉苦練絕世好劍同伊健施展雪飲狂刀外，仲有唔少特技鏡頭！據知《風》片係中國首齣全程於廠內拍攝，融合藍布景嘅特技電影，成齣電影仲有過千個特技鏡頭，所以拍成後要再花咗十六個月嚟後期製作。