採：音樂組　文：專案組　攝：林 楠

糾纏了近年半的床照風波，早前終於落幕，阿嬌在床照事件上痛過、哭過、怨過。自事件發生後，她和Edison仍未曾碰面，即使男方早前回港多天，亦與阿嬌緣慳一面。據知，Edison本周六將現身馬來西亞，為時裝品牌Juice的新店主持開幕禮，湊巧屆時阿嬌亦身在當地，拍攝馬國啤酒廣告，拍完便火速返港，據悉阿嬌以七位數字酬勞接拍，扮演多款造型的啤酒女郎。

搭早機返香港

為免與Edison撞到應，阿嬌特意選搭周六早機離開馬國返港，刻意避開Edison。至於雙方經理人公司的發言人均表示不知對方會到馬國，Edison經理人公司的梁小姐說：「Edison唔知阿嬌去馬來西亞，如果碰面都會點頭問候下。」

另外，阿嬌昨日拍攝VEVA手機平面廣告，有傳Edison私下向阿嬌MSN道歉，並相約飯敍「破冰」，阿嬌聞言說：「唔知呀！」至於會否Block對方？阿嬌反問：「佢？」然後點頭示意。問到會否應約赴會？她決絕說：「我應該唔會聽電話！（佢想破冰？）算啦！唔想再答呢啲問題。（當佢消失？）唔係，只係唔需要再理。（Edison唔搵你係咪最好禮物？）大家唔好再問啦！」此外，有指阿嬌接受內地湖南衞視的《背後的故事》訪問，播映期曾被押後，但最新消息指訪問將於下周播出，問到是否鬆一口氣？她說：「我一路冇諗過，其實拍嗰時唔係咁滿意，因為身體唔舒服。」

手機唔送Juno

阿嬌今次的手機宣傳費，一年已達5,000萬港元，貴為香港區代言人的阿嬌，昨日獲贈一部水瓶座的水晶手機。問到酬勞是否滿意？她說：「總之滿意，仲會無限量供應電話畀我！（送畀阿Sa？）梗係得啦！（麥浚龍呢？）佢咁有錢自己買啦！」阿嬌強勢復出後，廣告接踵而來，問到是否賺到盆滿缽滿？她說：「慢慢嚟，我好感激，嚟緊仲傾緊其他廣告。（主力拍廣告？）拍廣告好呀！（唱片工作呢？）冇咁長遠，先做好舞台劇，再計劃唱片同拍戲。」問到有否紓解財困？她坦承說：「我承認冇做嘢，都好想做番嘢，我都要生活。（供樓？）租出去咪得囉！其實我都夠錢供。（更搏命賺錢？）我以前都好搏命。（追番失去嘅嘢？）喺邊度跌低，就喺邊度起番身！」至於會否想以Twins名義亮相？她說：「梗係想啦！」