蔡卓妍（阿Sa）尋日同王祖藍、模特兒A. Lin及HotCha出席活動，宣傳佢哋配音嘅卡通片音樂劇，活動上，小丸子成日攬住阿Sa，難得佢唔介意太熱情：「工作嘛！雖然未見過裏面個人，不過知佢係女仔，喺日本嚟，加上着咗件衫就係小丸子啦！」玩遊戲時，有自稱陳灝（音：浩）嘅小朋友參加，祖藍當佢係「迷你版陳豪」，仲笑笑口問：「廖碧兒喺邊呀？」令全場人哈哈大笑！

阿Sa與王祖藍喜與卡通人物合照，童心未泯。	阿Sa（右二）與大家玩親子遊戲，氣氛熱烈。	A. Lin（左）與小朋友畫畫，相當投入。

啱啱喺內地做完嘢嘅阿Sa，自爆今次行程探足5次熱，防疫工夫做到足。對於玫瑰崗學校疑有學生集體吸毒，身為學姐嘅阿Sa就話只係個別例子：「畀多啲關懷佢哋啦！我讀書嘅時候，都冇啲特別有問題嘅同學，而且一直有同老師聯絡，如果收到邀請，我都會返去幫手宣傳禁毒！」

祖藍聲演花輪同學

至於最近忙到爆嘅祖藍，亦好識做咁話要多謝廣告商：「我Keep住有廣告，嚟緊有快餐店同旅遊公司，多謝佢哋冇換人囉！」祖藍又講笑話用咗「白韻琴式」嘅腔口為花輪同學配音：「簡直冇難度，因為我讀書時已經覺得自己好似花輪，哈哈！」