入行以來，張敬軒不時與王菀之在公開場合打情罵俏，又攬又錫，因而傳出緋聞，直至07年底，他被拍得一身街坊裝為Kenny放狗，二人的親密關係才曝光！其後，二人亦曾被拍得夜訪對方「香閨」，足證關係非淺！

食飽飽後，Kenny（左）做「柴可夫」載軒仔離開。

軒仔（左）全程頭耷耷，更與Kenny愈行愈開，十分避忌。

戴帽耷頭避途人

向來工作認真的軒仔，早前忙於籌備與方大同合作的音樂會，被迫「冷落」Kenny，日前他趁完騷後的空閒日子，陪Kenny到赤柱一間面海的餐廳撐枱腳。當日中午12時許，戴上格仔帽的Kenny，駕駛其綠色Mini Cooper接載頭戴鴨嘴帽的軒仔抵達赤柱，駛至餐廳門外時，軒仔先行落車入餐廳攞位，而Kenny則往附近泊車。

軒仔選擇坐在窗邊望海的位置，直至Kenny前來會合，才脫下眼鏡及帽子，狀甚輕鬆。二人點了意大利粉及飲品，開餐期間有說有笑，不時互望，又一本雜誌兩份睇，軒仔更被Kenny逗得笑逐顏開。

埋單後，二人一同步出餐廳，但當行至人多的地方時，即有默契地前後腳，未知軒仔是否擔心被認出，全程頭耷耷按電話，然後由Kenny做「柴可夫」載他離開。