容祖兒、鄭希怡、泳兒、衞蘭、黎明和《一百萬零一夜》三位童星等，前晚為慈善節目擔任表演嘉賓，節目以舞為主題，一眾藝員包括王君馨、湯盈盈、伊能靜及陳爽等均以勁舞娛賓。至於跳得之人容祖兒卻只唱不跳，事後她表示入行後經常穿高踭鞋，最近雙腳常有抽筋的感覺，她說：「我好想學踢躂舞，不過可能着得高踭鞋多，感覺到依家有後遺症，係靚嘅代價。每晚都要自己按摩雙腳，做運動前都會做定熱身，唔使做嘢嘅時候會即刻着番平底鞋。」

鄭希怡與陳偉霆以學生Look跳舞籌款。	Janice希望出韓語碟一償心願。	王君馨及伊能靜（後）表演跳舞，難度甚高。

陳奕迅稱靈活取勝

祖兒透露年底會與陳奕迅（Eason）合作開騷，屆時兩人會跳印度舞，她笑說：「印度舞我輸晒畀佢，我諗要食多啲嘢儲番個肚腩。」被嘲笑大肚腩的Eason則說：「印度舞冇肚腩都可以跳到，因為講線條，我嘅筋骨仲好靈活！」

至於鄭希怡、陳偉霆和泳兒則以純情學生造型在台上載歌載舞，收起性感的鄭希怡首次公開獻唱歌曲《So Sorry》，她坦言新歌以可愛為主，有別之前的歌路。

Janice出韓語碟預埋衞詩

另外，衞蘭（Janice）透露下月初推出英文碟，她說：「今次第一次主力英文歌，公司想做呢隻新碟，係想有新突破。」對於銷量，她坦言甚有信心，並希望可出韓語唱片：「之前啲碟媽咪因為聽唔明，所以聽一次就放埋一邊，我希望出韓語碟，威番次畀阿媽睇。（預埋妹妹衞詩？）絕對想，佢依家近況好好，努力學緊普通話。」