胡心諾早前被媽咪踢爆個性刁蠻又任性，為擺脫「港女」難服侍的惡名，她日前落手落腳幫一間火鍋店進行大掃除，雖然過程烏龍百出，但總算為對抗豬流感（H1N1甲型流感）出一分力！
今年只有17歲的胡心諾（Rainbow），仍在求學階段已有機會出騷、拍廣告，誤以為賺錢容易，自然唔知搵食艱難！最近豬流感肆虐，大小食店都加強清潔，Rainbow為吸取工作經驗，日前自薦到荃灣一間火鍋店幫手洗碗、拖地及抹窗，認真乖女。
身穿吊帶背心、短裙的Rainbow，打扮明顯與清潔工格格不入，老闆即找來圍裙及膠手套給她。準備妥當後，Rainbow先到廚房洗碗碟，見她起勢加洗潔精，愈多泡泡愈笑不停，可惜由於跣手，竟不慎將碗碟跌在地上，連頭髮亦沾上泡泡，場面尷尬，她不好意思地笑說：「其實我都有幫過媽咪做家務，好似洗碗同掛衫咁，但依家就少啲。」
打工曾被罵「八婆」
其後，她用「1：99」漂白水拖地及抹窗，雖然拿水桶時有點吃力，但仍出盡力不停抹，務求將細菌殺清光，個多小時後，總算完成所有工作，她開心地說：「其實我唔係冇捱過，中二時做過快餐店，當時仲畀個客鬧我係『八婆』。佢話我企喺度唔幫手做嘢，只係行來行去，但其實我當時只係做公關，結果喊住同經理呻，佢咪幫我解釋番囉！」
後記
歎豬骨鍋笑晒
為獎勵勤力的Rainbow，火鍋店老闆老二哥特別炮製金牌豬骨火鍋讓她品嘗，令她興奮不已，並笑說：「辛苦完一輪，覺得特別肚餓，真係連食物都好味啲㗎！」
場地：老二靚湯火鍋