惠英紅一向喺觀眾心目中都係女中豪傑，做俠女多過靚女，不過佢喺《巾幗梟雄》入面飾演嘅三奶奶，雖然話係鏢師個女，但性格就出奇咁懦弱，成日畀大奶奶食住，又畀老公話係「鵪鶉」，好彩佢最後都為咗個仔變得堅強，怒摑大奶奶！小小So睇見呢幕都同全港師奶一樣，鬼咁心涼，唔知惠英紅又覺得邊場戲最難忘呢？
惠英紅：呢場真係好難忘㗎！
小小So：係咪好爽？
惠英紅：我覺得觀眾睇得仲爽！因為觀眾都知我嘅為人係點。
小小So：真摑定係就位？
惠英紅：當然係嚟真啦！拍感情戲如果唔真打，效果會差好遠㗎！
小小So：心姐（謝雪心）係前輩，拍嘅時候有冇難為情，就住就住？
惠英紅：冇難為情！要拍得好一定唔可以留情，我哋拍開劇識得就位，識功夫嘅更加一定唔會打到佢隻耳仔！
小小So：擔唔擔心打痛心姐？
惠英紅：試位嘅時候大家都知要點拍，最後都係一次搞掂，如果拍完佢嬲我嘅話，就係佢嘅問題！