陳冠希在節目內與主播Anjali侃侃而談，且表示今次接受訪問，全因案件已經結束，他覺得是時候讓自己開腔，回應床照事件的一切。

A：Anjali E：Edison

A：想問一個簡單問題，點解當日會影呢啲相？

E：當你年輕嘅時候，有時做啲嘢或者就連自己都唔會完全理解，可能係覺得有趣……所有嘅相早喺2004年前已經影，當2008年流出，大家就覺得嗰個係陳冠希，其實呢個係舊嘅陳冠希先啱！當年我正認真咁面對一段關係，我墮入愛河，當你愛一個人，相信你會尊重同顧及佢嘅感受，我同佢（指女友楊永晴）有次討論緊自己嘅過去，我講畀佢聽發生過呢啲事，當時佢好唔開心，仲叫我刪除所有嘅相。

A：你有冇咁做？

E：有，我刪除晒所有，但六個月後我部電腦壞咗，所以叫助手攞去整，後嚟我協助警方調查，先知道原來有人將成個硬碟抄咗出嚟，將啲相重新整理番出嚟！

從沒畀人勒索

A：你對嗰個電腦技術員（史可雋）有乜感覺？

E：感覺同當初已經唔同晒，我原諒咗佢，況且佢已經承擔咗法律責任……不過我好懷疑偷相同發布相片嘅，究竟係咪同一個人，不過佢所做嘅，無疑係一件帶有惡意嘅事，但中間冇涉及金錢利益，從來冇人勒索過我，連警方都有問過我呢個問題，我都答佢哋我好肯定。

A：覺唔覺得自己有做錯？

E：我唔可以話自己冇錯囉！我太過唔小心，同埋唔係好明白後果有幾嚴重，總之我有錯要認囉！

不能永遠匿埋

Edison的「深情剖白」內，親身否認情變傳聞，且大讚女友Vincy幫他渡過難關，給他的感覺恍如神奇女俠，不避嫌人前大晒恩愛，他亦多次強調從來沒有將床照給其他人看。至於有指他曾自殺，他同樣否認：「自殺唔單止放棄自己，仲係放棄愛你嘅人，喺呢個階段，我有太多嘅人要照顧。」至於「無限期退出娛圈」的意思，他也指是華人傳媒曲解了他當日的意思而已。今次能夠返港，他大感高興：「可以見番家人、朋友、公司同事，重遊過去八、九年最熟悉嘅一處地方……雖然我唔知道大家仲會唔會接受我，仲有冇其他嘅恐嚇，不過我唔能夠永遠匿埋！」

而昨晚有線播出CNN訪問的足本中文字幕版，播放中途卻因機件故障突然沒有字幕。