回港近一星期的Edison密密為復出鋪路，但不少藝人均藐爆其反口行為，昨日謝婷婷出席活動時不屑地說：「聽到厭啦！呢個圈好多人講呢啲嘢，好多嘢唔係自己決定，唔係Plan咗，係有好多原因。」言下之意是指並非他想復出便可成功。她又指對Edison的行為零興趣，笑言不會追電視劇般等睇他在CNN中的訪問，婷婷說：「I Don't Care，我冇興趣亦冇時間睇呢啲嘢。」她表示如果是慈善的話不介意合作，問到若一同拍戲又如何？她即笑說：「你哋搵套戲畀我拍先！」

袁彌明寸Edison取巧冇悔意，並「祝福」他事事不順利。	Amanda戥受害女星可憐，希望事情告一段落。	周麗淇拒絕評論Edison復出一事。

一向「事事關心」的袁彌明（Erica）亦插爆Edison的「無限期言論」，她說：「佢好聰明，不過唔應該用呢個論點去復出囉！用英文撻讀者咁！又話中文傳媒，推卸責任！」她表示Edison指是女仔自願給他拍照，簡直是推翻一年來的道歉，Erica並為對方送上「祝福」：「希望佢唔好風光復出，咁樣對被封殺女星好唔公平，希望佢唔好咁順利！」

查小欣寸唔真誠

而自言一早就預料到Edison會復出的白韻琴更說：「你信佢呀？依家話係傳媒曲解，喺度玩字！佢要多謝幫佢寫嗰個！」白姐姐又暗寸：「佢唔做呢行可以做咩？又出名咁多女仔圍住！無論做嘢同溝女，佢都大把前途，呢啲係佢專長，願者上釣，前途可能好過以前添！」她直言覺得Edison完全冇歉意：「呢個世界冇公義，你情我願，佢仲有大把機會。」

至於查小欣亦忍不住寸Edison：「佢應該態度真誠啲，依家好似駁嘴咁，應該要好似上次記者會咁連戲。」她笑說：「可以講係因為爸爸破產，孭起頭家而復出狂搵錢。」另外，Amanda S.指事情已過去，受害女星已很慘，問到會否支持Edison復出，她禁不住贈句：「要睇觀眾接唔接受啦！」