薛凱琪、楊怡及楊崢前晚擔任無綫節目《美女廚房》的嘉賓，炮製「墨西哥朱古力雞」及「墨西哥仙人掌烤軟餅」。廚藝麻麻的薛凱琪與楊怡，分別邀請梁祖堯及吳家樂到場幫手，其中老友鬼鬼的楊怡及吳家樂煮餸時竟意見不合，發生內訌，場面惹笑！他們炮製的雞，味道雖然不過不失，但雞肉上卻黐着大大條雞毛，令評判之一的張達明大為反感。

楊怡煮「墨西哥朱古力雞」時，顯得雞手鴨腳。	劉浩龍不斷在旁騷擾，搞到薛凱琪忍不住說：「妖！你唔好搞我啦！」	梁祖堯幫手煮又幫口試味，助薛凱琪洗去「地獄廚神」的污名。

事後楊怡死撐：「隻雞唔係我哋劏，唔關我哋事，係隻雞嘅錯，正宗飛甩雞毛呀！（冇毛會唔會高分啲？）可能會，啲雞毛唔知係咪喺張枱度黐番嚟！（出現內訌？）係啦！佢落咁少雞去煮，我不停話唔夠食，佢就話夠，激鬼氣，自己煮多兩隻雞翼，不過我哋平時都係咁玩，冇嘢嘅。」

薛凱琪妖妖聲送帛金

至於被封「地獄廚神」的薛凱琪，全靠好幫手梁祖堯助陣，令她爆冷在首道菜中勝出，主持即叫她重金回報祖堯，不過薛凱琪竟說：「朋友呢啲嘢唔係用金去衡量，係用帛金（白金）。」認真恩將仇報！事後她解釋：「唔係帛金，係唱片嗰隻白金。」煮餸期間，由於劉浩龍不斷在旁騷擾，令到薛凱琪不禁爆一句：「妖！你唔好搞我啦！」