去年2月，Edison在香港為床照風暴舉行記者會，當時他表示會退出香港娛樂圈，事隔才年多，他日前接受CNN電視台訪問時，被問到為何要復出？他即寸爆說：「講起就好笑，好多傳媒，尤其係中文傳媒，話我講過永遠離開娛樂圈，其實我係講無限期，可能依家啲人唔明白無限期嘅意思，可能係代表5分鐘，亦可能係2千年，我從來冇講過係永遠！」
約恐嚇者坐低「拆局」
對於曾接「全球追殺令」的死亡恐嚇，Edison坦言擔驚受怕：「如果我唔驚就呃你，我從來冇諗過自己會受到死亡恐嚇，我諗點解有人想殺我？直到依家，我仍然唔係好明白，但我仍要繼續過自己嘅生活！」他更表示想與向他發死亡恐嚇的人會面：「我想同佢哋坐低傾吓，我唔理佢哋係邊個，我哋都可以傾得掂，我唔相信生命可以畀人了斷！」
能言善辯的Edison，提到床照風暴時更以「受害人」自居：「我相信我係受害者，對於啲相外流，我冇嘢可以做到，我唔可以話我冇做錯，我承認有錯，如果唔係我錯，我都唔會道歉，但同時我唔係犯罪者，我亦為呢件事承受好多！」
床照事件爆發後，Edison並無與受害女星交談過，他竟解釋是「因為搵唔到佢哋」：「我唔知點樣接近佢哋，點同佢哋開口講！」對於張栢芝的指控，他說：「基於警方要求，佢哋調查緊我，我唔可以同佢傾偈！我要受審，嗰時要諗好多嘢，我唔想為自己掩飾，但我希望佢明白，而我亦希望佢今日或者有朝一日能原諒我，同明白我嘅苦衷，我真係唔想呢件事發生，我仍然尊重佢！」
尚未分手讚女友超人
另外，曾是Cookies餅碎之一的Angela日前在電台節目，大爆Edison與女友楊永晴（Vincy）分手，不過Edison受訪時，問到Vincy如何面對床照風暴、二人是否情侶？他說：「對我嚟講佢係戰士，亦係女超人！我曾經收埋自己，但我唔想講到我好似懦夫，當時我真係好緊張！依家佢每日返學。（仲係咪一齊？）係！係！真係神奇！」
訪問出街之餘，Edison昨日繼續高調現身，昨午12時半，他面帶笑容離開酒店，更企定定任影，揮手講早晨。問到他接受CNN電視訪問，會否擔心影響受害女星？他聞言即黑面，並無回答便登車離開，座駕直駛鰂魚涌錄音室。至4時許，Edison好友何超儀亦前往該處，相信二人開會，超儀逗留約3小時離開，而Edison則於8時半離開鰂魚涌，直驅四季酒店晚膳。