張栢芝在今年2月26日接受有線電台訪問，當時栢芝對Edison可謂恨之入骨，怒斥對方「貓哭老鼠假慈悲」，事發後又關掉電話玩失蹤，還欠一眾女受害人一個道歉。

拉姑拉着活潑好動的Lucas在ifc行街街。	拉姑（左）在售賣茶葉的店舖內歎茶，談得興高采烈。	栢芝家姐戴碧芝（左起）抱着女兒，與拉姑及栢芝母子等到童裝店選購。

「床照事件」發生一年多，陳冠希終在CNN訪問中公開向栢芝道歉，栢芝經理人前日雖表示不作回應，但昨日栢芝接受記者訪問時，卻大方表示接受遲來的道歉。

Shopping完後，栢芝母子和拉姑等人登上七人車離開。

霍汶希出席活動時，拒絕評論Edison復出一事。

心情大靚的栢芝昨日先與家人歎茶，其後與奶奶拉姑分道揚鑣行街街，約傍晚六時再會合。記者發現栢芝單手抱住兒子Lucas，與拉姑、剛從加拿大返港的家姐戴碧芝、姨甥女、工人和兩名助手，在中環太子大廈的一間童裝店內，期間姨甥女不停扭計，家姐碧芝被迫留在門外氹女，而兩名助手則不停在舖外張望，發現有記者後，栢芝起初都有點慌亂，試圖抱住Lucas拔足狂奔，但得悉是本報記者後即大方接受訪問，被問到可有接受陳冠希的公開道歉？她邊行邊說：「好接受，不過我冇睇（CNN訪問）。（覺唔覺遲咗？）唔緊要，遲定早唔係咁重要，最緊要係有心，我都好開心，聽到佢咁講，希望之後大家可以畀啲空間我哋啲女仔啦！」其後栢芝登上早在大廈門口等候七人車離開。

否認種生基

而拉姑與栢芝會合前則與Lucas在ifc行逛，拉姑語重心長表示希望事件告一段落：「任何嘢都應該完結，畀啲小朋友一條路。（覺唔覺得太遲？）講得玄啲，放過人哋等於放過自己，啲國家主席都畀人舉牌遊行，愈有胸襟嘅人先愈得人佩服。」

對於Edison復出，拉姑認為每個人有自己選擇自由：「唔需要大驚小怪，有啲人打死唔食牛肉，最終有一日咪偷食。」另有報道指謝霆鋒在02年曾種生基改運，她說：「冇咁嘅事，冇聽過，平時就應該拜多啲神，唔好臨急抱佛腳。」

傷痛已忘掉

另一女受害人鍾欣桐（阿嬌）雖然未有現身，但卻回覆本報說：「我自己嘅人生已去到另一個階段，有個新開始，呢啲係以前同過去嘅事，特別係啲唔好嘅回憶，唔會再去諗。」而經理人霍汶希（Mani）昨晚出席活動時說：「其實好似係傷口度灑鹽咁，冇必要咁做，不過每人有自己選擇權利，呢個係我個人諗法。（阿嬌唔開心？）佢冇再睇呢啲新聞。」

對於Edison曾揚言無限期退出香港娛樂圈，但現在卻有意復出，Mani反問：「唔評論，係佢選擇權利，與我哋無關。」至於CNN宣傳短片中重現床照，Mani表示律師正在處理中。