要數當今樂壇最多「朵」嘅男歌手，小小So認為新一代歌神陳奕迅（Eason）絕對當之無愧。Eason入行以嚟，除咗同英文名同音嘅「醫神」外，原來仲有「Delay哥」、「吹神」同「雨神」嘅朵。
小小So早排同Eason傾偈，佢好有耐性咁解釋番每個「朵」嘅背後意思，佢話「Delay哥」嘅由來，係因為做專訪試過要Delay（延遲）同遲到，不過佢都好坦白，話入行以嚟都未試過準時，所以會改呢個陋習，希望有朝變成「On Time（準時）哥。」至於「吹神」就唔使多解釋，無論乜話題，佢都可以傾餐飽。小小So好奇問「雨神」又點解呢？Eason笑笑口話佢每逢去台北、廣州同昆明登台，就必定落雨，雨水仲浸上膝頭哥！
Eason講開有條癮，自爆近期多咗個「新朵」，就係「佛山讚自己先生」，佢話有次錄音，監製居然冇讚佢，於是佢問監製點解啦，監製笑笑口咁話：「你咁勁，使乜讚？」自此，Eason就成日自誇好勁，佢話要自己讚自己先至係懂得欣賞自己！