本文重點
英皇小花詩雅鏡頭前嬌俏可人，但私下和一般港女無異，屬於「野蠻女友」，日前她對貌似周柏豪的型男相當粗暴，打手臂、捏面、扯衫領樣樣做齊，但轉頭她又黐身黐勢作小鳥依人狀，型男被她「軟硬兼施」招數冧到暈。
詩雅（Michelle）自從加盟英皇之後，憑着其甜美笑容，火速成新一代少男殺手，備受力捧的她，剛完成電影《愛出貓》的拍攝工作，近日又忙於練舞自我增值。不過「吊頸都要抖吓氣」的Michelle，百忙中不忘相約靚仔拍拖減壓。
日前Michelle和昂藏「六呎」的「大隻版周柏豪」型男到海港城的「冒險樂園」尋開心，如連體嬰的兩人，先後玩掟公仔、夾公仔及打籃球等刺激性屬一般的遊戲，但仍然玩得大呼小叫，相信醉翁之意不在酒。
玩到心都「創」的Michelle，也不理商場耳目眾多兼是偶像身份，大模廝樣的翹實型男到運動用品店買三點式泳衣，Michelle將一套三點式泳衣放在身上給型男過目畀意見，但型男似乎取笑她着得不夠靚，Michelle即賭氣地要型男着給她看，接着大笑一番。「玩」完泳衣，Michelle行經男裝部想幫型男揀衫及睇波鞋，當她看中一件T恤時，型男連更衣室也懶入，即場換衫乘機露出六舊腹肌給Michelle欣賞，未知Michelle是被型男的豪放舉動或其當眾露點嚇到O晒嘴，即發揮野蠻本性，使出花拳狂打型男的手臂叫他勿放肆。
一件Cake兩份食
及至下午茶時間，兩口子黐實到茶座歎咖啡及分甘同味吃一件Cake，在等餐期間，未知型男是否激嬲女友，Michelle突然出「爪」捏型男的面，坐低後又面燶燶的用力扯型男的衫，發揮其野蠻本性，令型男頸後的紋身也告曝光，不過型男照單全收，轉頭Michelle又回復甜笑，和型男喁喁細語，搭扶手電梯離開時更挨身挨勢，電到型男飛起。
記者致電Michelle問她是否蜜運中，她哈哈笑，故作神秘的沒承認也沒否認，問她型男的底細，她說：「總之佢係我一個好親密嘅人，佢係做兼職模特兒同救生員。（公司畀拍拖？）冇話唔畀，只要唔影響工作就得。」