英皇二千萬簽基仔

基仔同金牌大風嘅續約風波終於有定案！本報收到消息話基仔畀英皇嘅誠意打動，以二千萬天王價過檔，絕對唔係外傳一千萬簽三年嘅條件。英皇為向基仔顯示誠意，仲豪掟二百萬喺北京同澳門開簽約記者會。

吳雨（右）與陳輝虹就基仔過檔一事隔空「過招」。

基仔簽約英皇，鍾舒漫變相成為其師姐！

頭場係星期日（5月31日）喺北京六星級酒店度搞，現場仲放埋煙花，單係咁就要使過百萬人民幣，但酒店話怕煙花有危險，依家仲同英皇傾緊；第二場就喺下個星期五（6月5日）喺澳門搞，英皇老闆楊受成、CEO吳雨、霍汶希同英皇一姐容祖兒都準備去撐場。英皇知基仔想進軍電影圈，除幫佢出廣東、國語碟外，仲幫佢開戲拍添！

吳雨陳輝虹互寸

前晚英皇CEO吳雨同金牌大風CEO陳輝虹一齊出席活動，吳雨主動同陳輝虹握手後就暗中互片！記者問吳雨幾時公布基仔加盟，佢竟然問陳輝虹幾時公布，陳輝虹話：「你公司嘅嘢做乜問我呀？」吳雨反擊：「乜基先，鄭中基呀？」問到係咪有變數？吳雨又寸陳輝虹：「或者佢升咗CEO，會發功呢？」陳輝虹即刻掩住嘴笑！